Päivännouzupuolen tie: Pitkäsrannas luajitah fil’mua
Histouriellizen Päivännouzupuolen tie -fil’man yhty seeriedu ruvetah kuvuamah Pitkäsrannas. Uuttu fil’mua, kiuduas rodieu kaheksa seeriedu valmistau online-kinoteatru Okko da Sreda-kompuanii.
Kinuo kuvatah Moskovas da Pitkäsrannas — linnan järvirannas, Koirinoja-kosken rinnal da Eestinsuarel. Sinne on jo luajittu puuhizet lavvoitukset, telat da tovellizet vikingoin drakkar-venehet ennevahnazeh luaduh. Ku kinokuvat roittas kaunehembat erähis kohtis järvirannas kasardettih tuhjot da pienembät puut.
Piäroulilois kinos suau nähtä Aleksei Serebr’akovan da Darja Vereščaginan. Joukkoh artistoikse kučuttihgi paikallizii eläjii.
— Tiijustin, ku Pitkäsrannas ruvetah luadimah kinuo da kirjutimmos sinne. Otettih moizih rouliloih: orju-käskyläine da sluavilaine naine. Enzimäi otettih sluavilazekse, sit kirjutettih, ku päin tiedoiniekakse. Tiijän, ku joukkokuvuamizih tulou meigälästy dai Piiterispäi rahvastu. Ruadopäivy kestäy seiččemes čuasus huondestu seiččemendessäh ildua, kerdoi Oma Mediale petroskoilaine Natalja.
Uuzi fil’mu kerdou R’urikah, vikingoih da Ven’an valdivon alguh panendah nähte. Uvves kinos ozutetah sidä aigua, konzu Luadogan mualoil herrannu oli R’urik, meijän mualoin kauti Jevroupas Vizantijah suate viettih tavaroi torrukse.
Fil’man ohjuajannu on Morad Abdel'-Fattah, kuduadu kaččojat tundietah Jekaterina Velikaja- da Lendäi laivu -kinoloin luadijannu.
Yhty Oman Median kanualah MAX:as!
