Pähomaičuz – Šoujärven vepsläižen etnografižen muzejan kehitoitandale
Karjalan rahvahiden sebruden kodiš mäni Karjalaižiden, suomalaižiden da vepsläižiden ezitajiden ištund Karjalan Valdkundan pämehen ohjandusel. Sil pagištihe Šoutjärven vepsläižen etnografižen rados, turizman kehitoitandas karjalaižiden da vepsläižiden tradicionaližiš elotahoiš da ““Карелия – Karjala”-etnokul’turižed matkad” -projektan todenzoitandas.
— Mel’kinan pertiš kehub elo, tehtas erazvuiččid azjtegoid, akcijoid, avaitas ozutelusid, joga voden tuleb 12000-14000 mest. No om völ Tučinan pert’, mitte kaičeb Suren Kodiman voinan istorijad. Vodelpäi 2012 se varastab endištamišt. Vodel 2023 oli tehtud endištandan projekt. Nece om lujas tärged meiden täht. I ku ozastub endištada necida muštsijad, mö voim paremboitta muzejan kaluiden kaičendan oloid i enamba ozutada vähäluguižen vepsän rahvahan kaluid meiden kacujile, sanui Šoutjärven muzejan pämez’ Natalja Anhimova.
Muzejas kaičese äi unikaližid vepsläižid kirjoid. Mugažo om äi etnografižid da fol’klormaterialoid, miččid kerazi Rürik Lonin ajades ekspedicijoihe, i nügüd’ muzejan radnikad varastaba, konz ned lähteba eloho.
Tarkištele "Oma Median" MAX-kanalad!
