Ozuteluz: Todesižiden vepsän kul’turan da elon kandajiden modkuvad starinoičeba äjas
Šoutjärven muzejas avaitihe Ilja Timinan foto-ozuteluz. Sil voib nähta Änižröunan vepsläižiden küliden eläjid — lapsid, norid, vanhoid ristituid, a mugažo vepsläižid külid, miččed om kuvatud korktudespäi. Kaiked ozutelusel om ezitadud 27 fotokuvad.
— Tehta ristituiden fotokuvid ei ole kebn azj. Ezmäi om jüged kuvitelda, miččen linneb ristitun modkuva. No konz paginan aigan löudase ühthižed tutabad, melentartused, siloi ristit avaidase. Erašti oleskeleba mugoižed čudokahad azjad, miččed abutaba avaita, el’geta ristitud paremba, kuvitelda, miččen hän linneb fotol, starinoičeb Ilja Timin.
”Vepsläižed modod”-foto-ozuteluz om tehtud Vepsän kul’tursebran ”Kel’ — minun Kodima”-projektan aiagan Karjalan pämehen grantoiden fondan rahatugele.
Ozuteluz radaškandeb muzejas voden lophusai. Jäl’ges se todas Kalagehe, Šokšuhu da Petroskoihe, miše eläjad voižiba nähta ičtaze fotokuvil.
