”Ozakahad ühtes”: Petroskoiš tehtas kanzan forum
Heinkun 8. päiväl Petroskoiš mäneb kanzan ”Ozakahad ühtes” -forum. Forum om omištadud Kanzan, armastusen da uskoližuden päiväln praznikale, mitte praznuitas ortodoksižiden pühiden Petran da Fevronian muštoks. Foruman aigan tehtas mel’vajehtelused, ozutelused, interaktivine ilotuzprogramm kanzoiden täht, mastar’-klassad da vändod. Neciš starinoičeba foruman tegijad VKontakte-gruppas.
— Forum om azjtego, mitte ühtenzoitab ristituid: vanhembid da lapsid, rahvahan, školan, kundan ezitajid da eläjid. Forum ühtenzoitab ühtnikoid ümbri kanzan kal’husiš, tuges da ristituiden lämiš kosketusiš, sanuba foruman tegijad VKontakte-gruppas.
Foruman pätemad oma lapsiden kazvatuz da openduz, äilapsiden kanzoiden da eriližen voinoperacijan ühtnikoiden tugi, kanzan tomotused, tervhuz’, sport da aktivine elon lad.
— Ühten foruman päazjtegoišpäi linneb Kanzoiden parad. Mugoine astun om hüvä azjtego, kirjutiba foruman tegijad VKontakte-gruppas.
“Ozakahad ühtes” -forum om avoin lava paginan, hengenlibutandan, mahtišton vajehtusen da tugen täht. Nece om voimuz vastatas üks’hengeližidenke ristituidenke, jagatas ičeze kanzan istorijoil da libutada henged toižile ičeze ozutesel.
Uzištoid neciš temas voib lugeda mugažo suomeks.
