Šoutjärves vaumištadas Vägestusen päiväks
Kut toižiš-ki Venäman agjoiš, Šoutjärves mäneba Vägestusen päiväle omištadud azjtegod. Üks’ niišpäi tehtas homen Šoutjärven vepsläižes etnografižes muzejas.
Vastusele anttihe “Lehteldes aigan lehtpolid” -nimi. Programmas om istorijoid voinan polhe külän eläjišpäi, Vepsän rahvahan horan da Ladvan muzikškolan ezitused.
— Mö vaumištim min’oroiden fotokuviden ozutelusen. Tahtoim ozutada nenid ristituid, kudambad puhtastiba meiden mad minoišpäi. Mugažo vastusel külän eläjad jagasoiš ičeze heimolaižiden johtutesil voinan polhe. Muštlem meiden baboid da dedoid, starinoičeb Šoutjärven vepsläižen etnografižen muzejan pämez’ Natalja Anhimova.
Suren voinan Vägestusen 80-voččele päiväle omištadud azjtegod mäniba jo Šoutjärven školas da kirjištos.
