Šoutjärves ozutase školteatr
Kaiked 55 Karjalan školad ühtni projektoiden rahoitusen konkursaha, niišpäi vägesti 11. Vägestajiden keskes om Šoutjärven škol “Teatrpaja”-projektanke .
— Paukrahoile tahtoim ostta teatraližid dekoracijoid, kaludištod, ombelta sädoid. Planoiš om vaumištada nel’l’ teatrozutelust: üks’ — “Vepsläine sarn” -festivalin täht, toine — tätüozuteluz vepsän kelel, koumanz’ linneb omištadud Suren Vägestusen jubileivodele, da tal’vkus tegem teatrozutelusen Udeks vodeks, starinoičeb Šoutjärven školan vepsän kelen opendai da üks’ projektan ohjandajišpäi Ales’a Anušenkova.
“Teatrpaja” -projektan tegijad oma 8. klassan openikad Darja Fedorenko da Jekaterina Feškina, 10. klassan openik Zoja Putul’an i lapsiden opendajad Ales’a Anušenkova da Sem’on Jefremov. Teatrharjoitelused vedetas kaks’ kerdad nedališ. Kaikutte tahtnik voib ühteta radho. Projektan aigan tehtud spektakl’ad ozutadas Šokš- da Kalag’-küliš-ki.
