Šoutjärves mušttihe Vasilii Kononovad
Pühäpäivän, 15. uhokud, Šoutjärven vepsläižes etnografižes muzejas mäni “Kaites nimed südäimes” -mušteht, mitte oli omištadud tetabale vepsläižele horeografale Vasilii Ivanovič Kononovale. Muštehtan tegijad oma Vepsän rahvahan horan ühtnikad, Šoutjärven muzejan radnikad, Kul’turan i joudajan aigan keskusen radnikad.
Ehtale kerazihe vepsän rahvahan kul’turan da Vasilii Kononovan sädandradon navedijad. Sigä ezini Vepsän rahvahan hor — Vasilii Kononovan eläb kul’turjäl’gestuz. Horan čoman ezitusen aigan adivoil oli hüvä voimuz kundelta tetabid vepsläižid pajoid, tundistadas vähäluguižen rahvahan muzikaližen kul’turanke.
— Vasilii Kononov tegi ani suren panendan kut Karjalan, muga kogonaižen Venäman-ki kul’turaha. Mö voim ülendadas sil, miše vepsläižiden keskes om mugoižid tetabid da lahjakahid ristituid. Om tärged tehta muštehtoid, starinoita norile vepsän rahvahan kul’turjäl’gestusen polhe, sanui “Oma Media” -portalale Larisa Čirkova, azjtegon ühtnik.
Täl vodel Vepsän rahvahan horale täudub 90 vot. Necikš znamasižeks päivmäraks Šoutjärven vepsläižes etnografižes muzejas avaitihe ozuteluz. Se starinoičeb horan polhe erazvuiččiden kaluiden da fotokuviden abul. Vasilii Kononovan muštehtal adivoile oli taritud tundištadas sen čoman ozutelusenke i kundelta horan istorijas.
“Kaites nimed südäimes” -muštehtal pagištihe Vasilii Kononovas da hänen kul’turjäl’gestuses, elos i sädandrados. Ristitud johtutiba tetaban horeografan elon melentartuižiš aigtegoiš, hänen ičeladuižes tabas da lahjavudes.
Tarkištele "Oma Median" Telegram-kanalad!
