Šoutjärves mäni “Eläban mušton purtked” -školidenkeskeine konferencii
Šoutjärves mäni “Eläban mušton purtked” -školidenkeskeine konferencii.
Konferencijale tuliba 1.—11. klassoiden openikad susedkülišpäi — Šokšuspäi, Kalagespäi, Paišpäi.
Školidenkeskeine konferencii Šoutjärves tehtas jo amu. Sen nimi oli “Todesižed vepsläižed”. Konferencijan täht lapsed vaumištiba ičeze oppindradoid kodiküläs, sen eläjiš, vepsän rahvahan kul’turas da keles. Täl vodel konferencijale anttihe toine nimi — Vägestusen jubilevodeks Surel voinal.
— Necil vodel oli taht, miše lapsed oppižiba süvemba kodiröunan istorijad da vaumištaižiba Suren voinan temale omištadud oppindradoid. Ved’ kaikuččes perehes oma vai oliba voinan ühtnikad – ken-se vojui, ken-se abuti tilas. Om tärged kacta kodiröunan istorijaha neciš polespäi patriotižen kazvatandan täht, sanui školan pämez’ Natalja Bikova.
Lapsed vaumištiba oppindradoid nellän nominacijan täht: “Todesižed vepsläižed”, “Minun armaz, minun čoma kodirand”, “Muzejan ozuteluzkalu — üks’ istorijan oppindan mahtoišpäi”, “Te Vägestusennoks”. Kaikuččes nominacijas žürijouk valiči vägestajad da laureatad.
