Tähtaz-jouk om sündnu vodel 2000 Änižröunan sportškolas. Joukus om koume eri-igäižed gruppad: 5-8-voččed lapsed, 9-13 da 14-18-voččed lapsed. Kaiked jäugmäčhu vändab 36 last. Hö oma äjiden sportakiadoiden da turniroiden vägestajad. Jubilejan vodel jaugmäčun jouk om sanu hüvid lahjoid. Suren abun andoiba Karjalan futbolan federacii, Venäman futbolan sojuz da UEFA-organizacii. Aigemba lapsile lahjoitihe čoma uz’ sport-tandreh, uz’ honuz’ urokoiden täht da varništ. Nügüd’ osttihe mugažo mäčud, uded sportsädod, openduzlaud da kalud harjoitelusiden täht.
— Lapsed oma ihastusiš. Mö varastim necidä 20 vot. Lapsiden vanhembad abutiba rahoil. Kanman Ut vot pidab uništada. Minä toivon, miše minun openikoil om uništuz i se om ühthine kaikil – vägestada koronavirusad, möst vastatas da jatkata opendust, sanui Tähtaz-joukun harjoitai Sergei Safonov.