Kanman Lapsiden kaičusen päiväd Šoutjärves mäni čoma praznik. Täudui 90 vot Šoutjärven lapsiden päivkodile. Praznikale päivkodin pert’he kerazihe äi rahvast – enččid radnikoid, päivkodin pästnikoid, sebranikoid, nügüdläižid lapsid ičeze tatoidenke i mamoidenke. Päivkodin radnikad ühtes lapsidenke vaumičiba adivoiden täht melentartuižen programman. Praznikan aigan oli horovodoid, karguid da pajoid, starinoitihe päivkodin istorijas, johtutadihe enččid radnikoid da ozutadihe vanhoid fotokuvid.
— 90 vot nece om sur’ jubilei. Läz kaikiden Šoutjärven külänikoiden elo om sidotud necenke päivkodinke. Minä iče kävelin neche päivkodihe. Tahtoižin spasiboita kaikid, ked radoiba i radaba nügüd’ lapsiden päivkodiš, venhembid, kudambad iče käveliba päivkodihe, a nügüd’ heiden lapsed da vunukad käveleba sinna. Sanun heile äi lämid sanoid i toivotan satusid rados, sanub Šoutjärven päivkodin pästnik, Zakonoiden tegendan kundan deputat Ol’ga Šmajenik.
Tämbei päivkodihe kävub 55 last. Sigä lapsed ühtes kazvatajanke Ol’ga Kokorinanke vätes opendaba vepsän kel’t, pajataba pajoid, opendaba runoid, ozutaba sarnoid kodikelel. Lapsile lujas om mel’he opeta vepsän kel’t.