Šotlandian Errol-lidnas 11. kül’mkud pandihe uz’ muštpacaz. Se om omištadud sovetskijoile kolnuzile lendajile. Muštpacaz om tehtud Šokšun babarm-mujuižes kvarcitaspäi. Sen avtor om Karjalan vestai Aleksandr Kim.
— Muštpachan tahtoiba tehta Venäman da Velikobritanian eläjad, kudambil oli üks’ himo – antta norile pol’vile mušton, sanui Venäman posol Andrei Kelin.
Vodel 1943 Velikobritanian valmehed andoiba Sovetskijale Sojuzale ”Albemarl”-kaks’motorižiden bombardirovščikoiden partijad. Errol-aviabazale oigetihe venälaižid lendajid. Vodel 1943 semendkus, openduzmatkoiš, miččed oli sidotud neche voinazjaha, koume lendajad koliba.
Babarm-mujuine kvarcit om unikaline da lujas čoma kivi. Kivi saskeltas Šokš-posadas Änižröunas. Kivi ottas sen täht, miše čomenzoitta tärktoid arhitekturižid muštpachid. Sišpäi om tehtud Tundmatoman saldatan kaum Moskvas läz Kremlin seinäd da Napoleonan sarkofag Francias.