Osmo Borodkinin hauta on kunnoššettu
Osmo Borodkinin muissolla omissetun projektin rajoissa on kunnoššettu taiteilijan hauta Petroskoin Peski-kalmismualla. Šen viereššä on ašetettu tiijotuštaulu Karjalan taiteilijan elämäštä ta hänen luovašta ruavošta.
– Borodkinin hauvan muistomerkin šäilyttämini ta kunnoštamini on projektin yksi piätehtävistä. Šillä on Tašavallan merkitykšen muistomerkki -statussi. Šäilyttyä muistuo Osmo Pavlovičista on tärkie, šentäh projekti toteuttuuki. Šamoin projektin rajoissa oli järješšetty šamannimini näyttely Karjalan kanšallisešša musejošša ta valmistuu virtualinäyttely, šano projektin johtaja Marina Dubova.
Kunnoštamisruatoloih oli kučuttu volont’orija – Petroskoin yliopiston opaštujie. Hyö ašetettih betoniobeliski, korjattih aitauš, kunnoššettih paikkua hauvan lähellä. Uuvvissetun hauvan avajaisih tuli taiteilijan punukka ta pravopunukka, projektin etuštajie ta yliopiston opaštujie.
Karjalašša Osmo Borodkinie tunnetah Louhen piirin Oulanka-kyläštä šyntynyönä taiteilijana ta Kalevala-eepossan kuvittajana.
