Oraškuun “Kipinä” vuottau kešyä ta purou aivopähkinöjä
Voijahko muurahaiset paissa? Nähähkö kiššat muailmua vain muššanvalkiena? Vaštaukšet näih kyšymykših šie löyvät verekšeštä “Kipinäštä”.
Kuvalehen šivuja šeluallen šie luvet taiteilijan Dmitrii Dmitrijevin runostarinoja ta Sergei Georgijevin “Tepon starinoja”. Saamelaini starina “Hirvaš-järvi” opaštau šilma tottelomah vanhempien neuvoja, a Lev Vorobjovin laulu ta karjalaini loru lahjotetah kešätunnelmua.
Tämän vuuvven kešällä täyttyy šata vuotta, kun Karjalan kallivoilla löyvettih vanhoja piiruššukšie. Mukavista “neolitin viestilöistä” luvet Karjalan kivikirjan šaloja arvellen -materialissa. A Kipinäläiset-rubrikissa on esitetty pakauttelu kuvalehen taitotoimittajan Ol’ga Demidovan kera, missä hiän šelittäy hyvän lapšienlehen erikoisukšie.
Šamoin “Kipinän” parissa šie opaššut luatimah spagettie manšikan kera, a Valentina Mironovan artikkelista šuat tietyä, mitä Pietari Šuuri ruato Karjalašša.
— Kuvalehen uuvvešša numerošša on hyvin äijän erilaisie tehtävie: pelijä, šanarissikköjä, aivopähkinöjä. “Kipinän” korissukšena on Pikniekal-tehtävä vienakši ta livviksi šekä mukava liimaukšien šarja. Kuvalehen tehtävistä šuat mukavan homman kotijoukolla tahi kaverien kera ajan vietokši, on varma “Kipinän” toimittaja Ol’ga Smotrova.
Hyvyä matkua uuših šeikkailuih “Kipinän” kera!
