Openikoiden konferencii: Šoutjärven školale – 220 vot!
14. kül’mkud Šoutjärven školas pidetihe tedoliž-praktikaline konferencii, mitte oli omištadud školan 220-voččele jubilejale. Azjtegoho ühtni 5.—11. klassoiden openikad, kudambad vaumištiba melentartuižed dokladad ičeze školan bohatas istorijas. Konferencijan aigan mugažo johtutadihe školan männuziš sabustusiš da planuitihe tulijoid sabustusid, starinoitihe “Školiden iniciativoiden rahoituz” -projektan polhe. Vodel 2025 Šoutjärven škol putui necen projektan vägestajiden lugetišhe i sai rahad ičeze idejan (školteatran) todenzoitamižehe.
— 2026. voden b’udžetas mugažo planuitas antta rahoid školiden openikoiden iniciativoile. Nece om hüvä azj, nece opendab lapsid vastusenpidändaha: konz heiden projektad toidenzoittas, hö nägeba, kut tärged om rata da panda väged ičeze idejaha, sanui Šoutjärven školan pästnik, Zakonoiden tegendan kundan varapämez’ Ol’ga Nikolajevna Šmajenik.
Konferencijan dokladoiden temad koskiba Šoutjärven školan elon erazvuiččid polid. Kaikid norembad ühtnikad, 5. klassan openikad, starinoičiba školan roliš ičeze kanzoiden istorijas, a 6. klass vaumišti dokladan pästnikoiš, kudambad valičiba eloradoks pedagogan ten. 7. klassan openikad ozutiba, miččen suren panendan školan paremboitusehe tegi sen enzne pämez’ Tatjana Sergejevna Smirnova. Südäntkoskijan oli 8. klassan openikoiden ezituz: hö starinoičiba opendajiš — Suren Kodiman voinan ühtnikoiš.
Vanhembad openikad mugažo ihastoitiba žürijoukud: 9. da 11. klassoiden openikad starinoičiba Šoutjärven školan satusekahiš pästnikoiš. Eriline homaičuz oli kingitadud 10. klassan radho: školan muzejan abunke openikad udessündutiba vanhad al’bomad da oppiba arhivmaterialoid.
Konferencijan lopus žürijouk tegi ühthevedod: ezmäižen sijan saiba 8. klassan openikad, toižen — 6. klass, a koumandeks tehtihe 7. klass. Azjtegon aigan mugažo oli ozutadud spektakl’, miččen školan openikad vaumištiba “Školiden iniciativoiden rahoituz” -projektan aigan.
Tarkištele "Oma Median" Telegram-kanalad!
