Opendai Šoutjärvespäi kucui prezidentad adivoihe vepsläižidennoks
Vepsän kelen opendai Anastasia Jevtušenko ühtni vastusehe, miččen vedi meiden valdkundan pämez’ Valdimir Putin “Tedod. Ezmäižed” -tedotuzmarafonal Moskvas.
“Tedod. Ezmäižed” -tedotuzmarafonan aigan Vladimir Putin vastsihe Venäman igähižiden vähäluguižiden rahvahiden ezitajidenke. Karjalad necil vastusel eziti vepsän kelen opendai Anastasia Jevtušenko Šoutjärvespäi. Hän starinoiči prezidentale ičeze perehes, küläs, miččes eläb, kiti kohetud federaližes tes da kucui adivoihe vepsän male.
— En usko, miše pagižin Vladimir Vladimirovičanke. Nece oli minun uništusen! Nikonz en unohta necidä päiväd, jagoihe ičeze tundmusil Anastasia.
“Tedod. Ezmäižed” -tedotuzmarafon mäni Moskvas 28.—30. sulakud i om omištadud Venäman rahvahiden ühtmuden päiväle. Videod vastuselpäi voib kacta tägä.
