Opaštajat kerrottih kurššien ruavošta
Karjalaisien, šuomelaisien ta vepšäläisien kieliresurssikeškukšen šyntymäpäivän juhlimisen rajoissa piettih seminari “Karjalan, vepšän ta šuomen kielen opaštamisen keinoja”. Kurššien ruavošta kerrottih opaštajat Tatjana Islamajeva, Tatjana Morozova, Tatjana Baranova, Marija Šašina, Marija Kočerina, Uljana Tikkanen ta Valerija Grafova. Kurššien ohjelma eruou koulu- tahi yliopisto-ohjelmista, šentäh ni opaššuškeinot ollah erikoiset.
— Kielikurššien pitämini on keškukšen šuurin ta tärkein ruato. Myö olemma ilosie, jotta viiješšä vuuvvešša järješty opaštajien vakituini ryhmä. Hyö ollah ammattilaiset, kumpaset hyvin tiijetäh kieltä ta šuatetah šitä opaštua. Kiitän niise opaštujie, kumpaset voitih järještyä opaššušprosessin, šano seminarissa Periodika-kuštantamon johtaja Natalja Sinitskaja.
Kieliresurssikeškukšešša pietäh karjalan kielen vienan, livvin ta lyydin murtehen, vepšän ta šuomen kielen alku- ta jatkokurššija. Tänä vuotena kurššiloilla ilmottautu 162 uutta opaštujua.
