Karjalan Kanzallizes muzeih avattih Talvimeččy-ozuttelu. Ozuttelus voibi arvata arbaituksii elättilöih nähte, tiijustua, midä elätit syvväh da kus eletäh talven aigua.
– Muzeis on äijy ozutteluu täyzi-igähizile ristikanzoile, ga nuorembile školaniekoile da pienile lapsile on vähä. Sendäh piätimmö luadie Talvimeččy-ozuttelu, kus paiči ekskursieloi, pietähgi urokkoi da erilazii ruadopajoi, saneli Karjalan kanzallizen muzein tiedoruadai Maija Stepanova.
Enzimäzinny ozutteluh käydih Petroskoin suomelas-ugrilazen školan toizen kluasan opastujat. Omat mielet ozutteluh nähte sanoi Roma Markov:
– Mieldy myö ozuttelus roittih jänöit da oravat. Ekskursien aigua minä tijustin, ku kudžoit luajitah suuret koit muan ale da säilytetäh sie syömisty.
– Minuuhäi miellytti huahmoi, sendäh ku sil on kaikis pitkin da lämbevin karvu, ližäi Sem’on Berestnev.
Ozutteluh voibi kävvä tossarres pyhäpäivässäh 10.00–18.00 aigua. Ozuttelu ruadau sulakuussah, sit muzeih kačotah valmistua ozuttelu linduloih nähte.