On valmis oppikirja yläluokkalaisie varoin
“Vienankarjalan oppikirja: 10.—11. luokka” on nähnyn päivänvalon. Šen luatijat ollah karjalan kielen opaštajat Jevgenii Karakin ta Jelena Pankratjeva. Painoš lopettau oppikirjojen šarjan koululaisie varoin.
Oppikirjašša on 18 aivan erilaista teemua, kuin esimerkiksi matkuštamini, ammatin valinta, globaliproplemoja, media, Karjalan merkittävät kirjailijat ta toiset. Jokahisešša kappalehešša on teksti luvettavakši, kyšymykšie käsiteltäväkši pienissä ryhmissä tahi parissa, kieliopilliset tunnit ta tehtävät šekä luovat harjottelutehtävät.
— Täššä oppikirjašša on šyvemmin kačeltu kaikki teemat, kumpaset jo oltih iellisissä oppikirjoissa. Pakina- ta kielioppiteemat ollah opaššušohjelman mukah. Lisäkši tahon šanuo, jotta kirjan valmistamisešša olima yhteisruavošša Oma Mua -lehen kera, kumpasešta oli otettu tekstijä šekä VepKar-korpussin kera, jotta koululaiset tuttavuššuttais resurssiloih, min avulla voipi kehittyä kielineruo, šelitti oppikirjan luatija Jelena Pankratjeva.
Oppikirjašša tekstien rinnalla on äijän vanhoja ta nykyaikasie valokuvie.
Karjalan piämiehen rinnalla toimijan šanaštokomiisin hyväkšymä oppikirja on painettu Karjalan tašavallašša opaššukšen kehityš vuosina 2014—2025 -ohjelman rajoissa.
Aihiešta voit lukie niise venäjäkši.
