On tulos: Karjalas piettih fourumu
Karjalan tazavallas piettih alovehelline fourumu ”On tulos!”. Fourumalazet šeikuittih Yhtehine Ven’a -puolovehen viizivuodehizen programman tuloksii da kehoituksii tuliekse aigua.
— Uuttu programmua myö tuaste luajimmo yhtes omamualazien kel. Kehoituksii jo otammo vastah. Piälimäine siändö: uskaldua vaigu sidä, min voimmo täyttiä. Sil myö eruommo omis poliittizis opponentois. Tärgei rouli on deputuatoil da puolovehen alaozastoloil. Tänäpäi tärgevimänny ollah vastavukset rahvahien, yhteiskunnallizien liitoloin kel, käyndät ruadojoukkoloih. Kyzyn, ku sih ruadoh yhtyttäs Karjalan urhoit -programmah kuulujat, erillizen voinuoperatsien veteruanat — voinumiehien da heijän perehien kannattamine vältämättäh ruvetah kuulumah uudeh programmah, sanoi Artur Parfenčikov omassah lehtistöpalvelule.
Omas paginas Karjalan piämies sanoi, ku Yhtehizen Ven’an ruadoprogrammu on ”ruadai mehanižmu” da sen tovestetah jälgimäzet viizi vuottu.
Erillizen voinuoperatsien ihan allus algajen Yhtehine Ven’a auttau omamualazii voinuoperatsien alovehel, uuzis da raja-alovehil.
Vaigevuksih huolimata Karjalan tazavaldu ei azetannuh kehitysprojektoi. Puolovehen programman mugah on nostettu 5 uuttu školua da lähes puoli sadua on perustehellizesti kohendettu, on rakendettu 17 lapsien päivykodii, 37 ambulatouriedu, on ostettu meedikkulaittehistuo — 3, 8 tuhattu palua. Karjalas nostetah kiirehellizen avun bol’ničan hirurgija-korpussua, jatkutah rakendusruavot tazavallan bol’ničas. Kukoinmäil avavui uuzi polikliiniekku.
Viijes vuvves uvvistettih alovehellizien tielöin lähes 1200 kilometrii, niilöin luvus Lobanovan sildu Petroskois. Paiči sidä on kunnostettu suat puustot, kujot, lapsien da sportukentät tazavallan äijis kohtis.
Yhty Oman Median kanualah MAX:as!
