Omapajolazet kerrottih sordavalalazile karjalazien kul'tuurah nähte
Mennyön nedälin lopus karjalaine Oma Pajo kävyi Sordavalah. Oniegas Luadogah suate -projektan mugah pietyn matkan aigah horaniekat tuttavutettih Sordavalan eläjii Karjalan tazavallan kandurahvahan kul´tuurah. Oma Mua -lehten toimittai Margarita Kemppainen kerdoi sordavalalazile školaniekoile karjalazien ennevahnazis perindöllizis ruutis.
— Oli ylen mieleh nähtä da kuunnelta karjalazien naizien da miehien ruutis. Net ollah ylen čomat, naizil vie čomembat, migu miehil, sanoi Oma Mediale Sordavalan školan viijenden kluasan opastui Alina.
Margaritan paginan jälles lapsil oli mahto panna piäle ennevahnazet ruuatat da luadie oma kuva tantamareskas.
Omapajolazet Anna Usova da Nikolai Karpin kerrottih lapsile omas tuotandos: Anna kirjuttau runuo karjalakse da kiändäy runuo karjalakse suomen da ven´an kielis, Nikolai kirjuttau ven´ankielisty prouzua lapsile, kerdou karjalazien kul´tuurah da perindölöih nähte.
Lapset arbailtih karjalazii arbaituksii, heile saneltih karjalazih suarnoih da sananpiälöih nähte. Sen mugah opastettih heile karjalazii sanoi. Lapset tiijustettih, mindäh sanotah, ku karjalazet syvväh pedäjän kojua.
Projektan pidoloih kuuluigi Oman Pajon vastavus sorvalalazen Russkaja pesn´a -horan kel. Petroskoilazet pajattajat pajatettih karjalankielizii pajoloi, sorvalalazet paiči ven´ankielizii hol´aitettihgi karjalazen Duarjaine-Muarjaine. Sordavalalazien pajattajien keskes ongi karjalastu inehmisty, sendäh karjalazet pajot da perindöt ollah heile hyvin tutut. Konsertan lopus Oma Pajo da Russkaja pesn´a yhtes pajatettih karjalakse da ven´akse pajon ”Terveh, Karjal!”. Kaččojua da kuundelijua Sordavalan joudoaijan keskukses oli täyzi zualu.
Projektua ”Oniegas Luadogah suate” Ven´an prezidentan grantufondan kannatuksel todevutetah ”Anuksenlinnan karjalazet” da Oma Pajo -hora. Projektan pivot algavuttih mennyt vuon sygyzyl da jatkutah tänä vuongi.
Aihies voit lugie ven'aksegi.
Yhty Oman Median kanualah Telegramas!
