Oman rannan histourii: uvvet opastuskirjat
Karjalan opastundan kehityksen instituutan piän al on suadu loppuh suuri ruado. Ollah luajittu uvvet opastuskirjat ”Karjalan tazavaldu. Meijän rannan histourii” viijenden, kuvvenden da seiččemenden kluasoin opastujih nähte.
— Nygöi opastuskirju on työtty Ven’an opastusministerstvah ekspertiizale, ku sen jälles se pandas opastuskirjoin federuallizeh luvetteluh, sanoi Oma Mediale Natalja Grigorjevskaja Etnokul’tuurizen opastuksen keskuksen johtai.
Opastuskirjoin luadijoin joukkoh kuuluttih Petroskoin valdivonyliopiston da Karjalan tazavallan školien opastajat. Karjalan tazavaldu kuuluu Ven’an niilöin subjektoin joukkoh, kudamil enzimäzinny pidi luadie opastuskirjat ”Oman rannan histourii”. Karjalan b’udžietale oli annettu varua opastuskirjan luadimizeh.
