“Oman Muan” kujo nygöi nägövis
Käskyn “Oman Muan” kujon da äijien toizien kujoloin da uuličoin nimittämizes ualekirjutti Petroskoin linnukunnan endine piälikkö Irina Mirošnik 25. pakkaskuudu 2021.
– Hedi kujon perustettuu sen nimi rodih Petroskoin online-kartois, ga enämbän vuottu aigua kujol ei olluh nimilaudua. Tänäpäi, 22. sulakuudu, ubo-uuzi nimilaudaine kiinitettih Periodika-julguamon taloin kulmale, kulman toizes puoles rodih Titovan uuličan nimilaudu. Oma Mua -lehti piäzöy ilmah juuri “Periodikas”, sendäh sen kujogi on sijoitannuhes julguamon tyveh, sanou “Oman Muan” piätoimittai Ol’ga Smotrova.
“Oman Muan” toimittajat pietäh puhtahuos kujuo, mennyt keviäl hyö kabrastettih kai topat kujolpäi, talvel pietäh silmäl, ku sie aijoilleh suomittas lundu da tulijan oraskuun allus tuaste pannah kujo kundoh.
“Oman Muan” kujon nimilaudu on luajittu da azetettu uuzien siändölöin mugah, kudamat hyväksettih mennyt vuon kevätkuus. Siändölöin mugah Petroskoin uuličoin nimilavvat pidäy olla kaksikielizet. Kaikkiedah on kiännetty karjalakse 1 528 linnan paikannnimie.
