Oman Muan 35-vuozipäiväkse: pivot algavuttih
Vuvvennu 1990 perustettu Oma Mua -lehti täyttäy tänä vuon 35 vuottu. Merkipäivän kunnivokse on luajittu programmu, kuduan mugah lehten toimittajat lähtietäh ruadomatkoih Karjalan eri piirilöih. Enzimäine kylä, kuduas lehten ruadajat vastavutah omien lugijoin da kirjuttajien kel, on Vieljärvi.
— Meidy otetah vastah Vieljärven školas. Algukluasoin da kuvvenden kluasan opastujile meijän lehten toimittai Margarita Kemppainen sanelou karjalazien ennevahnazis ruutis da čomenduksis da opastau soittamah kandelehel, Ol’ga Smotrova kehoittau vesselii kieliharjaituksii, Valentina Mironova kerdou, mit ollah ennevahnazet karjalazet runot, sanoi Oma Mediale Natalja Sinitskaja, Oma Mua -lehten piätoimittai.
Oman Muan toimittajat huavatah lehten merkipäivän kunnivokse ruadomatkoi Anuksen da Priäžän piirih. Suurdu pruazniekkupiduo lehten roindupäiviä vaste 6. kezäkuudu Periodika-julguamo varustau Veškelyksen kyläs etnokeskuksen tilois.
