Omamualazet ečitäh tieduo Anna Samsonovah nähte
Priäžan lyydilaižed sananpolved -kniigan algusanas “Rahvahan mielevuden kuldaižed d’uured” on mainittu, ku vuvvennu 1959 Grigorii Makarov on piästänyh ilmah Karielazet sananpolvet, privutkat, arvautukšet -kogomuksen. Tämän kniigan da eri lehtilöin kauti Grigorii Makarov potakoičči rahvastu keriämäh sananpolviloi da sananpiälöi da työndämäh niilöi Karjalan tiedokeskuksen Kielen, literatuuran da histourien instituuttah.
Potakoičuksih vastattih enimyölleh opastunnuot kyläläzet. Enämbän toizii sananpolvie työndi Priäžän opastai Anna Timofejevna Samsonova. Hänen enzimäzes kirjazes, kudaman häi työndi Instituuttah kylmykuus vuvvennu 1960, oli kaksikymmen karjalastu sananpolvie. Net oli kirjutettu kirillizil kirjaimil ilmai kiännöksii da sellityksii.
Vastah Anna Timofejevna sai kirjazen, kudamas hänel sellitettih, kui pidäy oigieh kerätä tämänmostu materjualua. Yhtehizen ruavon aigah Anna Timofejevnan työndi Instituuttah läs tuhattu lyydilästy sananpolvie da sanondua.
– Anna Samsonova oli intelligentnoi da opastunnih ristikanzu, häi työndi kirjazii Instituuttah vuvven 1962 loppussah. Sulakuus 1968 häi kuoli. Pahakse mieldy, tämän naizen elokses libo hänen omahizih nähte tänäpäi ei ole tieduo. Priäžän školan opastajien luvettelos hänen nimie ei ole. Minä potakoičen Oma Mua -lehten lugijoi, ket tundiettih Anna Samsonovan libo tundietah hänen omahizii, kirjuttamah toimitukseh. Joga tiedo olis tärgei meile, kirjutti toimitukseh Vera Ivanova.
