Čoma tal’vku “Kodiman” lehtpolil
Om pästtud eloho “Kodima”-lehtesen tal’vkun nomer. Se tegihe ani praznikaližeks, sikš ku udes nomeras starinoitas školiden jubilejiš, voden satusiš da sabustusiš, čomiš azjtegoiš.
Vereses “Kodiman” nomeras eriline homaičuz kingitadas openduzsferale. Koumel vepsläižel školal täl vodel oli znamasine päivmär — 220-vozne jubilei. Tal’vkun nomeras voib lugeda siš, kut nece aigtego praznuitihe Šokšun školas, a mugažo Šoutjärven školan praznikaližes konferencijas.
Sur’ da melentartuine kirjutez om omištadud Tatjana Sergejevna Smirnovale — Šoutjärven školan lahjakahale opendajale. Materialan vaumištiba školan openikad, miše enamba ristitud tedištaiži heiden pedagogas.
“Gornica”-etnosijas pidetihe Petroskoin Rahvahiden nevondan ištund, miččel pagištihe Karjalan rahvahiden keliden jäl’gestusen kaičendas. Suomalaiž-ugrilaižen školan pedagogad starinoičiba ičeze openduzmetodikoiš, tundištoitiba adivoid openduzkirjoidenke da vediba lühüdad keliden openduzčasud.
Moskvan valdkundaližes pedagogižes universitetas mäni Ühthižvenälaine kodikeliden opendajiden suim. Sigä oliba vepsän-ki kelen opendajad Gleb Fomin Šokšuspäi da Anastasia Jevtušenko Šoutjärvespäi.
— Kut i tobjimalaz, tal’vkun nomeraha om pandud čoma tulijan voden kalendar’. Sur’ spasib lahjakahale vepsläižele fotokuvadajale Ilja Timinale Orlik-hebon fotos! Praznikališt il’mištod lahjoičeb i lehtesen “Literatur”-lehtpol’: tal’vkun täht mö valičim tal’vesižed Oleg Mošnikovan runod da Jelena Filinan noidesižen sarnan, sanui “Oma Media” -portalale “Kodiman” pätoimitai Irina Sotnikova.
Mugažo udes nomeras voib tedištada Piterin agjan Vepsän kundan sabustusiš, Viktor Loninan udes kirjas, Paginkluban uzištoiš da Karjalan rahvahaližen muzejan udes ozuteluses.
Tarkištele "Oma Median" Telegram-kanalad!
