Oma Pajo: 35 vuottu karjalakse pajattamas
Kylmykuus Oma Pajo-hora täyttäy 35 vuottu. Merkipäiväkse pajojoukko valmistau suuren konsertan, kudai pietäh 24. kylmykuudu Kanzallizes teatras 19.00 čuasun aigah.
— Liput Oman Pajon konsertan oldih ostettu ylen terväh. Ammui mostu en musta. Ei kaikin puututa merkivuvven konsertah, sendäh omapajolazet piätettih kyzyö omassah VK-sivul, pidäsgo valmistua vie eräs konsertu. Nygöi keriämmö vastavuksii. Ku löydynöy pädii zualu da kerdynöy kuundelijua, konsertu rodieu, sanoi Oma Mediale omapajolaine Natalja Bogdanova.
Oman Pajon vuozipäivän konsertah karjalazii pajattajii tullah hyvittelemäh Jelena Magnitskoin soittojoukko, lapsien tansijoukko, muuzikkumies Andrei Smolin da omapajolazien endizen Sampsan kaššali -projektan tulos — lapsienjoukko, kudai soittau perindöllizii sävelmii.
Karjalan Rahvahan Liiton kehoitukses da kannatuksel vuvvennu 1990 perustettu karjalazien pajojoukko on liiton ”enzimäzii lapsii”. Samannu vuon Karjalan Rahvahan Liiton kehoitukses oli perustettugi Oma Mua -lehti. Kahtu vuottu myöhembä avavui Kanzallizien kul’tuuroin keskus, vie kahten vuvven peräs — Elias Lönnrotan nimine suomelas-ugrilaine škola. Net nygöigi jatketah omua taivaldu. Kaikkien liiton ”lapsien” joukos Omal Pajol on oma sija da oma rouli.
Yhty Oman Median kanualah Telegramas!
