Oma Mua da Karjalan Sanomat muututah
Vuvves 2025 algajen kaksitostusivuhine karjalankieline “Oma Mua” rubieu piäzemäh ilmah kaheksal sivul, suomenkieline kuuzitostusivuhine “Karjalan Sanomat” pienenöy kahtehtostu sivussah. Mollembat lehtet roitah mustu-valgiet.
— “Oma Mua” da “Karjalan Sanomat” endizelleh ruvetah piäzemäh ilmah joga nedälii. Toimituksien ruadajat kaikin jiäjäh ruadoh, vaiku otetah iäres tyhjät ruadopaikat, sanou Periodika-julguamon johtai Natalja Sinitskaja.
Kui vaikuttau lehtien pienemine tiluajien miäräh, tänäpäi on jygei sanuo. Oma Mua -lehten tiluajien joukko ruttoh pienenöy jälgivuozinnu.
— Lugijoin joukon pienenendän eräs syylöi on poštan paha ruandu. Rahvas linnas ei suaja lehtie aijoilleh, sanomattah kylisgi. Toiči tuvvah kerras kolme lehtie kolmes nedälis. Sendäh rahvas kieldävytäh lehten tiluamizes, eihäi se ole huovis. Kaheksasivuhine lehti rodieu huogehembi, ga ruvetannehgo rahvas tiluamah sidä... Joga murdehel, livvikse da vienakse, rodieu vaiku kolme kogonastu sivuu tekstua, se on vähättävy, tiettäväine, sanou Oma Mua -lehten piätoimittai Ol’ga Smotrova.
Vie yksi Periodika-julguamos ilmah päizii lehti “Kodima” rubieu piäzemäh ilmah endizelleh kerras kuus kaheksal sivul vepsän da ven’an kielel.
Aihies voit lugie ven'akse.
