Oma Media: viizi vuottu ruadau karjalan, vepsän, suomen da ven’an kielil
Monikieline kanzalline Oma Media algoi ruavon syvyskuus vuvvennu 2020 da täyttäy tänäpäi viizi vuottu. Ven’an kanzoin azieloin federualline agenstvan kannatuksen da varoih luajittu Oma Media yhtyi kuvvendekse joukkoviestimekse Periodikan viijen painetun julgavon joukkoh.
— Oma Media viijes vuvves valmisti enämbän 9 000 uudistu da enämbän 1 000 pitkiä kirjutusti karjalakse, vepsäkse, suomekse da ven’akse. Uudizii kirjutetah Periodika-julguamon lehtien da žurnualoin ruadajat. Oma Media julguau uudizii da kirjutuksii tazavallan elaijan eri puolis: ekonoumiekku, kul’tuuru, tevolližus, muatalovus, sotsioala, erillizeh voinuoperatsieh yhtynyzien kannattamine da opastus, sanoi Oma Median piätoimittai Mikko Nezvitskii.
Erinomastu huomivuo Oma Media painau pidoloih, kuduat ollah kiini perindöllizes kul’tuuras, meijän tazavallan histouries da perindöllizis hengizis arvolois.
— On tärgei, ku Oma Media tariččou lugemistu kui ven’an, mugai Karjalan kandurahvahien kielil, sanoi Periodika-julguamon piälikkö Jevgenija Šustova.
Oma Media -saital ollah ezitetty Periodikan jullattavat lehtet da žurnualat, sego karjalan da vepsän kielen kursit, kudamien vuoh suau ičeväil opastuo vienankarjalah, liygih da vepsän kieleh.
— Tuiliekse tahtozimmo jatkua karjalan da vepsän kielen online-kursiloi. Nygöi ečimmo varua, ku voizimmo luadie nämmien kielien jatkokursit. Paiči sidä saital ollah Oma radio da Oma video. Lähi aigua nämmä ozat roitah avattu kaikkien nähtäväkse, ližäi Mikko Nezvitskii.
Oma Media -saital ongi Karjalazien, vepsäläzien da suomelazien kielikeskuksen ozasto. Saital on olemas internet-laukku, kuduas voibi kaččuo Periodikan uuzii kirjoi da ostua miellyttäjii.
Aihies voit lugie vepsäkse, suomekse da ven'akse.
