Oma Media -portal: koume vot internet-verkos
23. sügüz’kud om tärged päivmär Oma Media -portalan istorijas. Tämbei mö praznuičem koume vot saitan avaidusespäi. Neciš aigas saital oli paindud 6000 uzištod da enamba 700 kirjutest karjalan, vepsän, suomen da venän kelil.
— Mö naprim säta mugošt kontentad, mitte oliži melentartušt eri-igäižile ristituile. Ičemoi materialoiš starinoičem elos Karjalas. Portalan kacundoiden lugumär ozutab, miše meiden uzištoid lugetas ei vaiše Venämal, no sen röunan taga-ki, starinoičeb portalan pämez’ Mihail Nezvickii.
Paiči uzištoid saital voib löuta videod, miččed starinoičeba karjalan da vepsän rahvahiden kul’turas, a mugažo voib opeta vepsän da karjalan kelid. Sen täht meiden portalale om pandud internet-kursad.
Portalad kehitoittas kaiken aigan. Nügüd’ planuitas avaita kaks’ ut saitan sargad: Oma Radio da Oma Video.
— Oma Radiol linneb voimuz kundelta podkastoid karjalan, vepsän da suomen kelil. Meletan, miše se linneb melentartušt da tarbhašt ristituile, kudambad opendaba nenid kelid, sikš ku hö voiškandeba kulda oiktad karjalan, vepsän da suomen paginad, sanui “Periodika”-painišton pämez’ Natalja Sinickaja.
— Oma Video-sargan abul portalan kacujad tundištasoiš painišton videoprojektoidenke, mugoižidenke, kut KV-šhow da Kuki-rikku, mugažo hö voiškandeba kacta videoid, miččed meile andaba Karjalan rahvahan sebr da Vepsän kul’tur sebr, ližazi Sinickaja.
Uzištoid neciš temas voib lugeda mugažo karjalaks da venäks.
