Regionaline projekt ”Karjalan ezinikad – 2021” uden sugupol’ven ohjandajiden täht om pästtud eloho vodespäi 2018 i tehtas joga voden. Sen tomotai om Karjalan valdkundan pämez’ Artur Parfenčikov, kudamb om sidä mel’t, miše Karjalas om äi ristituid, kudambad ei varaikoi vastusenpidändad i tahtoiba rata valdkundan hüvüdeks.
Necil vodel konkursaha ühtni 127 mest, niišpäi finalaha putui 39. Niiden keskes oma kul’turan radnikad, biznesmehed, valdmehed. Vepsläižišpäi ezmäižen kerdan konkursaha ühtni Anna Anhimova. Hän äjan tegeb vepsän rahvahan kul’turan kaičendan täht.
— Olen ihastusiš, miše putuin finalaha. Ozatelen kaikid konkursan ühtnikoid! Mö ozutim ičemoi mahtoid, tedoid, saim tärktan mahtišton i uzid tundištoitusid, sanub ”Kiži”-muzejan radnik Anna Anhimova.
Nügüd’ konkursan ühtnikad vaumičesoiš superfinalaha. Heile pidab kirjutada projekt mahtokahan opendajan ohjandusel. Vägestajad saba rahatuged, miše todenzoitta eloho ičeze projektoid.