Oleg Mošnikov om pauklahjoitud “Za vernost’ Severu” -medalil
Vepsläižele runoilijale, kirjutajale da Venäman kirjutajiden sebran ühtnikale Oleg Mošnikovale anttihe Venän Federacijan Pohjoižen, Sibirin da Edahaižen Päivnouzman igähižiden vähäluguižiden rahvahiden associacijan “Za vernost’ Severu” -medal’ sures personaližes panendas vepsän literaturan kehitoitandaha, tedoti “Vepsän kul’tursebr”. Pauklahjoičend oli tehtud kanman kirjutajan 60-vottušt jubilejad Karjalan Rahvahaližes kirjištos.
— Nece oli varastamatoi azj! Olin ihastusiš, jagoihe Oleg Mošnikov ičeze melil pauklahjoičendaspäi “Oma Media” -portalanke.
Oleg Eduardovič Mošnikov om prozakirjan da koumen runokirjan tegii. Hän kändab vepsläižid runoid venän kel’he da muga täutab äirahvahaližen Venäman kul’turfondad. Oleg Mošnikovan runod da starinad om kätud ročin, suomen da karjalan kelihe. Oleg Mošnikov om üks’ “Vepsläine literatur” -kirjutesiden tedokogomusen keradajišpäi da ühtnikoišpäi. Nece tedokogomuz läksi eloho vodel 2011 “Literaturine Venäma” -painištos, mitte ezmäižen kerdan ozuti Venäman literaturan nügüd’aigališt kehitoitandad vepsän udessündutadud kirjkelel. Hän äi kerdoid eziti Karjalan valdkundan vepsläižiden kirjutajiden sädandradod erazvuiččil ühthižvenälaižil da rahvahidenkeskeižil forumoil. Oleg Eduardovič tundištoitab venäkeližid lugijoid vepsän- da karjalankeližiden kirjutajiden da runoilijoiden sädandradonke, mi om lujas arvokaz azj.
Uzišt neciš temas voib lugeda mugažo venäks.
