Ol’ga Djačkova: “Ei-ainehellini kulttuuriperintö on yhtä tärkie ta aktualini”
Talvikuun 5. päivänä Karjalan opaššukšen kehityšinstituutissa vietettih etnokulttuuriopaššukšen kehitykšellä omissettu jokavuotini konferenšši. Tänä vuotena šen ošallistujat käsiteltih Karjalan kantakanšojen ei-ainehellisen kulttuuriperinnön šäilyttämistä ta välittämistä koulutušsistemih.
— Nykyjäh kašvatuš on yksi tärkeimmistä kanšallisista pedagosista prioritettiloista. Meijän konferenššin aihe on omissettu kašvatukšen aspektilla — Karjalan kantakanšojen ei-ainehellisen kulttuuriperinnön šäilyttämisellä. Ei-ainehellini kulttuuriperintö -termi otettih käyttöh vuotena 2003, ta myö olemma jo käsitellyn tätä aihetta. Ka elämä mänöy, lapšet kašvetah, tullah uuvvet šukupolvet, a teema on yhtä tärkie ta aktualini, korošti Karjalan opaššukšen kehityšinstituutin rehtori Ol’ga Djačkova.
Tilaisuš keräsi karjalan, šuomen ta vepšän kielen opaštajie, kielentutkijie, folkloristija, kašvattajie, kirjallisuon tutkijie, kanšalaisjärještöjen etuštajie ta kanšalliskielisien joukkoviestimien etuštajie.
Plenarikokoukšešša ošallistujat käsiteltih, mitein etnokulttuuriopaššušprosesissa eri laitokšien ruatajat esitetäh ei-ainehellista kulttuuriperintyö. Venäjän kielen lisäkši šeloštajat esiinnyttih karjalakši, šuomekši ta vepšäkši. Työpajojen aikana ošallistujat čukellettih Karjalan kantakanšojen musiikki-, tanšši- ta leikkikultturih. Šamoin konferenšissa toimi kolme sektijuo, missä eri opaššušlaitokšien ruatajat kerrottih omista parahista praktiikoista.
Yhty Oman Median Telegram-kanalah!
