Tedoiden päivän vanh Šokšun škol, miččele om jo 217 vot, avaiži verajad 90 openikale. Kaik openikad 1.-11. klassahasai opendaba vepsän kel’t. Paiči sidä kaks’ vot tagaze školan pämehen Nina Koren’kovan tomotusen mödhe openduzprogrammaha pandihe etnokul’turine komponent. Ozutesikš, likundurokan erased časud openduzvodes om omištadud vepsläižile vändoile, a literatural openikad tundištasoiš vepsläižiden avtoroidenke.
— Kahtes vodes mö nägištim satusid. Lapsil kazvab melentartuz’ kodiröunan istorijaha, surembal tahtol hö ühtneškanziba erazvuiččihe konkursoihe. Paiči sidä, minä meletan, nece azj ei anda unohtada kodiröunan rahvahan juriš. I nece om meiden školan erigoičuz. Kerdan mö starinoičim ičemoi mahtištos etnopedagogikan poles surel konferencijal, oli transl’acii, meid kacui kaik Venäma, sanub Nina Koren’kova.
Ližaks, školas pidetas vepsän fol’kloran da vepsän kul’turan fakul’tativad nenile openikoile, kudambad tahtoiba süvetas nenihe temoihe. A kaikuččen tožnargen urokoiden jäl’ghe školan opendajad ičeze tahton mödhe keradasoiš vepsän kelen kursile.