Šokšun eländtahol ozutihe tandreh sportkaludištonke

Uz’ kaludišt seižutadihe küläs läz sporttandreht. Kuva: Gleb Fomin

Kvarcitnii-küläs todenzoittihe eloho “Navedida sportad — olda tervhen”-projekt, miččen aigan tehtihe sijad, kus voib sportata ani irdal.

“Navedida sportad — olda tervhen”-projekt om oigetud likundan da sportan kehitoitandaha. Tegi sen Šokšun eländtahon TOS — sijaližed ičenaižed valdelimed. Projektan todenzoitandale oli anttud 495 tuhad rubl’ad, niišpäi 347 tuhad oli jagetud Karjalan valdkundan b’udžetaspäi.

— Projektan rahoile om osttud viž harjoiteluzkalud da kaks’ laučad. Kaik nece om azotadud külän keskuses, sanutihe Šokšun eländtahon administracijas.

Uz’ kaludišt seižutadihe küläs läz sporttandreht, kus sijaližed eläjad vändaba jaugmäčvandoho. Tošt mugošt sijad sportkaludištonke küläs ende ei olend.