Nuorien oppahien koulu toimiu Karjalašša
Priäžän piirin Vmeste-šiätijö jatkau Istorijan rataš -projektin toteuttamista, mi šai Presidentin kulttuurialottehien fondin kannatušta. Projektin yksi toimenpitoloista on Nuorien oppahien koulu Petroskoin ta Priäžän lapšie varoin. Kešäloman aikana koululaiset ruvetah tuttavuštumah Karjalan istorijah ta kulttuurih, čukeltumah etnoturismin alah.
– Lapšet ruatah Kintahan kyläššä. Šielä koululaisilla järješšetäh ni tapuamisie kokenuijen oppahien kera, kumpaset kerrotah heilä ammatin šaloja, kertou Šiätijön neuvošton johtaja Svetlana Hrebtova. – Myö ušomma, jotta tämä projekti antau mahollisuon popularisoija oppahan ammattie. Moušot kennih lapšista valiččou tätä ammattie elämän ruavokši.
Niin, nuorien oppahien koulun ošanottajat ruattih Kintahan huumorin festivalissa. Hyö jo iččenäisešti vietetäh ekskursijoja kylyä myöten ta šuahah positiivisie arvošteluja vierahilta ta turistiloilta.
Šen lisäkši Vmeste-šiätijön šuunnitelmissa on näyttelykompleksin peruštamini Kintahan kylän šiinä paikašša, missä ennein šijoutu ainutluatuni objekti – vesimelliččä. Melličän rakenti tavallini talonpoika ta še toimi šuurella lautalla Šuojun jovella. Niin vesimelliččä šai ruatua vejen tašah kaččomatta.
– Uutini šiitä, jotta Kintahan kyläššä oli uiva melliččä hyvin kummaššutti tietomiehie. Moušot še oli ainut šemmoni vesimelliččä? Kyšymykšie on äijän, ka voimma šanuo varmah, jotta meijän uiva melliččä on ei ainuoštah Karjalan, ka i koko Venäjän istorijallis-kulttuurini perintö, koroštau Svetlana Hrebtova. – Priäžän piiri voitti Karjalan tašavallan kanšallisen ta alovehellisen politiikan munisterijön järješšetyn kilpailun ta šai rahua kantakanšojen etnokulttuuriseh kehitykšeh šuunnatun projektin toteuttamiseh. Niin myö jo šaima mahollisuon luatie kompleksin disaini-projektin. Ka ieššä on vielä äijän työtä!
Nyt Istorijan rataš -projektin ruatajat kerätäh tietoja vesimelličäštä. Šiitä hyö luajitah näyttelykompleksi, mih kuulutah tiijotuštaulut šekä karjalaisien työ- ta kotivehkehet.
