Nuoret da lapset: ruadopajas tarvittavua ruadoneruo
Karjalan opistoloin ruadopajat uvvistettih kanzallizen Opastamine-projektan mugah. Opistoloin ruadopajat ollah opastuslaitoksien tilat, kudamis nuoret nygyaigazel laittehistol suajah praktiekkua da tärgiedy ruadokogemustu. Kanzallizen projektan hyvyös moizet ruadotilat luajittih Karjalan piälinnan opistoloih: Autotransportan tehnikumah, Tehnolougien da yrittäjien kolledžah, Pedagougizeh kolledžah, Mediekkukolledžah, Arhitektuuran da rakenduksen tehnikumah da Meččytehniellizeh tehnikumah. Uvvet opastustilat hommattihgi piirilöih: Sordavalan, Pohjazen da Kostamuksen politehniellizih kolledžoih.
Ruadopajat on luajittu 40 eri ammatile, niilöin luvus pienien autoloin kohendus da palvelu, syömizien keitändy, sotsiualuala da liečindyruado, farmatsii, žiivatoinliečindy, agronoumii da toizet.
— Meijän ruadopajis ollah nygyaigazet tiedokonehet, sen hyvyös myö voimmo suaja praktiekkukogemustu tiedokonehprogrammoin kirjuttamizes da tiedokannoin kel ruadajes. Ruadopajat on sijoitettu hyvin tiloih, nuoril opastua da ruadua sie on hyvä da mugažu, sanoi omat mielet Petroskoin arhitektuuran da rakenduksen tehnikuman toizen vuozikursan opastui Darja Timonen, kerdou Karjalan tazavallan piämiehen lehtistöpalvelu tiedottehes.
Vuvvennu 2022 Karjala yhtyi federuallizeh projektah ”Professionalitet”, kuduan mugah kogonah uvvistetah keskiopastuksen sistiemat tiettylöin laitoksien tarbehih niškoi. Federuallizen kannattamizen hyvyös Petroskoin autotransportan tehnikuman pohjale on luajittu kaksi klasterua konehtehniekan alal: ”Sampo” Petroskoin autotransportan tehnikuman pohjal, kudaman opastujile ruadosijoi tariččou Oniegan laivoin kohendus- da rakenduszavodu da ”Arktiekan” Pohjazen kolledžan pohjal, sen ”ruavonandai” on Segeežan tsel’l’ulouzubumuagukombinuattu.
Vuvvennu 2023 Tehnolougien da yrittäjien kolledžas on avattu opastusklasteru ”Petrovskaja sloboda”, kudai auttau nuorile suaja kogemustu turizman da palvelun alal.
— Ruadopajoin uvvistetun struktuuran da hommatun
opastustalovusymbäristön hyvyös, mittuine on tovvellizis laitoksis, opastujat parembi ellendetäh tehnolougiiprotsessoi da suajah se ammatti da net ruadonerot, kudamii tottutoven pidäy nygöi, sanoi Petroskoin tehnolougien da yrittäjien kolledžan piälikkö Galina Germanova.
Vuvvennu 2025 Kostamuksen kolledžan pohjal rubieu ruadamah keskus ”KarjerA”, kuduas ruvetah valmistamah spetsialistoi kaivandutalovuoh nähte. Tärgevimänny ruavonandajannu nuorile rodieu ”Karel’skii okatiš”.
Aihies voit lugie suomeksegi.
