Nored Karjalaspäi ühtneba Ühthižvenälaižehe saifestivalihe
Ženih da nevest Karjalaspäi — Aleksandr Kaširin da Ksenia V’ar’a — ühtneba “Venäma. Ühtenzoittes südäimid” -III Ühthižvenälaižehe saifestivalihe. Sigä nored kogonaižel Venämalpäi naiba suren praznikaližen naindveron aigan. Siš tedotab “Rossija” -Rahvahaližen keskusen press-služb.
Nece sur’ aigtego sädas 8. heinkud — Perehen, armastusen da uskoližuden päivän — Moskvas “Rossija” -Rahvahaližes keskuses. Registriruitud noriden keskes oma Aleksandr Kaširin da Ksenia V’ar’a Karjalan Valdkundaspäi. Ženih om sportmez’, harjoitai, runoilii, kundaline radnik. Mugažo Aleksandr om Karjalan Paralimpiadan komitetan pämez’, “Doktor Sport” -socialiž-tervehtumižen keskusen da “Üks’voibištelendan i vägidumižen keskusen” tegii da pämez’. Neniš keskusiš abutadas voinveteranoile paremboita tervhut. Nevest Ksenia opendase Petroskoin universitetas i sil-žo aigal radab Karjalan Ristituiden tugilikundsisteman problemoidenke sportfederacijan press-službas.
— Festivalil vasttase ženihoid da nevestoid kogonaižel Venämalpäi, meil linneb ühthine praznik. Meile om tärged praznuita Perehen, armastusen da uskoližuden päiväd ühtes ristituidenke toižiš regionoišpäi, ristituidenke, kudambad armastaba da arvostada toine toišt, sanuba Aleksandr da Ksenia.
8. heinkud “Rossija”-keskuses mäneb praznikaline naindvero. Sigä-žo edeližil festivalil sündnuded perehed andaba “Venäman südäin” -perehlämoin uzile perehile. Lämoi todas Muromaspäi, mitte om pühiden P’otran da Fevronian kodima. 9. heinkud festivalin ühtnikoiden da adivoiden täht vedetas mastar’-klassad, lugetas lekcijad, ozutadas kulinarine šou, tehtas ekskursijad keskusen ozutelusidme.
Miše ühtneda saifestivalihe, tariž jätta pakičuz “Rossija”-keskusen internet-lehtpolele.
Saifestivalin tegijad oma “Rossija” -Rahvahaline keskuz da Moskvan Valdmehišt.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
