Änižröun praznuiči kaks’ praznikad ühten aigan
Karjalan valdkundan päivän praznuičend mäni Änižjärven rajonan jubilejan Därvenojas. Praznik zavodihe sišpäi, miše Därvenojas pandihe štampoid počtkartaižihe vepsläižen poimetišenke. Počtkartaižid pästi Venäman počt vähäluguižel tiražal 95-voččeks Änižröunan jibilejaks.
Ilotuzprogramm mäni kahtes sijas: külän keskuses oli tehtud ”Lapsiden pallišt”, a ani Änižen randal seižuiba karjalaižiden käzitöiden mastariden rivid. Niidenke rindal ”Periodika”-paindišt ozuti ičeze painusid, a Karjalan Rahvahalinen kirjišt — kirjoid ičeze fondoišpäi.
— Meiden kirjišt surel tahtol ühtneb Karjalan valdkundan 102-voččen päivän praznuičendaha. Tämbei meiden ozutandsijal om taktiližid kirjoid erazvuiččile temoile. Meil om ”Ozoitesed korobaspäi”-vänd karjalaižiš tradicijoiš. Mugažo mö tegem kaičuztätüižen mastar’-klassan, satrinoiči Kirjišton holitusen erišton radnik Aleksandr Dokučajev.
Surel scenal mäni Karjaln röunale omištadud teatraline ozuteluz. Sid’ oficialižiden paginoidenke sil eziniba korktad mehed.
— Praznikal pidab pagišta satusiš. Meil saudas ted, lapsiden päivkodid da školad, mö tegem gazanvedändad. Täl vodel Karjala om vägestai tegeližuden poles. Meiden valdkund sai 6. sijan investicijoiden ližaduses Venämal. Kaik nenid satusid mö sabustim Karjalan eläjiden taguiči, sanui ičeze ezituses Karjalan pämez’ Artur Parfenčikov.
Praznikališt koncertad jatksiba tetabad sädaikollektivad Petroskoišpäi da toižiš Venäman lidnoišpäi.
Lopihe praznikaline programm lämoiambuskelusel.
