“Neroniemi”: mitä nuorilla on mukava kanšankulttuurissa
Neroniemi-toimenpito piettih Kanšainvälisenä muamonkielen päivänä. Še oli omissettu šemmosilla teemoilla, kumpasien avulla voipi šuaha nuorien kiinnoššušta kulttuurista ta kieleštä.
Enšimmäini luvento oli musiikista ta lauluista karjalan kielellä. Šitä valmisti Karjalan kanšallisen teatterin näyttelijä, io-ryhmän laulaja ta kitaran šoittaja Nikita Anisimov.
— Kanšallisen teatterin näyttelijä Vieno Kettunen anto miula tämän kirjan, še on Vladimir Brendojevin runokokomuš. Työ niättä mimmosešša kunnošša še on nyt ta voitta hokšata, kuin rikeneh mie otan šen käsih. Mie luvin runoja ta ymmärrin, jotta niistä tulou hyvie lauluja. Näin ne laulut šynnyttihki, šelitti Nikita.
Tänä vuotena Vkontakte-verkošša ruvettih julkaisomah lyhyitä videoita Karjalan kantakanšoista. Niitä valmissettih Gandvik-studijon spesialistit, a tekstit kirjutti Kiži-musejon šivissyšruavon spesialisti, Veri-ryhmän laulaja Marija Timonen. “Neroniemellä” Marija esiinty luvennon lukijana ta kerto projektista šekä omašta roolista šiinä.
Karjalan taiteilijan Dmitrii Dmitrijevin “Kalevalan” kuvitukšet on tuttu niillä, ken piti käsissä Runola-projektin kalenterie, Runostarinat-kirjua, Kalevala lapšilla -kirjua. “Neroniemellä” omalla luvennolla Dmitrii vaštasi piäkyšymykšen: “Mitein helpošti kiinnoššuttua lapšie vaikeista karjalaisista runoista?!”
Luventojen šarjan lopetti Etnokulttuuriopaššukšen keškukšen vanhin metodisti Ol’ga Hramtsova. Ol’ga Anatoljevna šelitti šuomelaisien šananlaškujen merkityštä.
— Kieli on kulttuurin koodi. Nykyjäh še häviey. Miušta pitäy kiinittyä šiih enemmän huomijuo ta lisätä alan tutkimukšie, jotta kekšie, mitein antua näillä kulttuurikoodiloilla uutta elämyä, šano Ol’ga Anatoljevna esitykšen lopušša.
Esitykšien välillä kaččojat arvauteltih arvautukšie ta oikeista vaštaukšista šuatih kirjoja lahjakši.
Kaikki luvennot oli nauhotettu videoh ta niitä voipi kaččuo Karjalaisien, šuomelaisien ta vepšäläisien kieliresurssikeškukšen VK-ryhmäššä.
