Nero ei ole selläs kannettavu
Karjalan Kanzallizes teatras 13. tuhukuudu 14.00—18.00 čuasun aigah pietäh ”Kižin neroniekoin fourumu”. Suureh pidoh kerävyy enämbi 60 neroniekkua Karjalas, Moskovas, Piiterispäi.
Pido on omistettu Elävy ekspozitsii -projektan 30-vuozipäiväle da Kižin muzein perindöllizien käzineroloin säilyttämizen da tutkimizen ozaston 20-vuozipäiväle.
— Mollembat nämmä projektat — ”Elävy ekspozitsii” da ozasto — ollah muzein ammuzen ruadajan Svetlana Vasiljevna Vorobjovan kehoitukset. Häi mennyt vuon siirdyi toizele ilmale, ga hänen ruado, hänen alletut projektat jatkutah, sanoi Oma Mediale Kižin muzein perindöllizien käzineroloin säilyttämizen da tutkimizen ozaston piälikkö Tatjana Barantsova.
— ”Elävy ekspozitsii” on ylen mielehine ruado, myö kučummo Kižin suarele muasteriloi ozuttamah omua neruo, suarele tulluzile on mahto omin silmin nähtä, kui vestetäh, ommeltah, kezrätäh, nieglotah, punotah tuohtu. Fourumah tahtoimmo kerätä kaikkii, ket 30 vuvves käydih suarele, mostu neroniekkua on enämbi 100 hengie, sanoi Barantsova.
Fouruman programmas rodieu Kižin neroniekoin luajilmuksien ozuttelu da ”Perindöllizien vehkehien jarmanku”, perindöllizien ruutien da kollektsieloin ozuttamine, folklourujoukkoloin ezitykset, media-ozuttelu ”Muasteri, pruazniekku, käzinero”, neroniekoin palkičendu.
