“Nece oli Karjalas” -pjes lugetihe Anna Lisicinan kodiküläs

Ezmäižen kerdan lugendaha ühtniba Šokšun, Šoutjärven da Kalagen školiden openikad da opendajad. Kuva: Galina Baburova

Karjalan päzutandan päivän Kalagen Kul’turpertiš lugetihe pjes kahten neiččen geroitegos. Lugendaha ühtniba vepsän man školiden openikad da opendajad.

Ezmäižen kerdan kirjutajan Aleksandr Ivanovan “Nece oli Karjalas” -pjes lugetihe vodel 2022 “Vepsän rahvahan tütär” -projektan aigan. Siloi lugendad mäniba Petroskoiš, Kvarcitnii- da Präža -küliš. Pjesan lugiba Karjalan rahvahaližen teatran artistad i Karjalan kul’turan da taidehen kolledžan openikad. Kalagen elotahon pämez’ Aleksandr Pol’akov uništi, miše nece pjes konz-ni oliži lugetud Sovetsikijan Sojuzan gerojan Anna Lisicinan kodimal-ki. Necil vodel nece idei hänen tomotusen mödhe tuli eloho. 

— Nece pjesan lugend erineb männuzišpäi sil, miše täl kerdal paiči Karjalan rahvahaližen teatran artistoid sihe ühtniba vepsläižiden küliden sijaližed eläjad. Tahtoin sanuda, miše nece om hüvä jouk. Ristitud holevas kaičeba muštod neniš tegoiš, heile om läheline pjesan tem. Kaik ozastui, kacmata sihe, miše nene ei olgoi professionaližed artistad da kenen-se täht nece oli ezmäine mahtišt lugeda än’heze äiluguižen kundliijoukun edes, sanui azjtegon ohjandai, Karjalan arvostadud artist Aleksandra Aniskina.

Pjesan lugendan jäl’ghe kaikiden täht oli tehtud ekskursii muzei-pertidme Anna Lisicinan muštho. 

Tarkištele "Oma Median" MAX-kanalad!