Natalja Anhimova: Armhale radole hän andoi jo enamba 32 vot

Natalja vedäb ekskursijad lapsile. Kuva Šoutjärven vepsläižen etnografižen muzejan arhivaspäi

Tämbei Šoutjärven vepsläižen etnografižen muzejan pämez’ Natalja Anhimova praznuičeb ičeze 55-vottušt jubilejad.

Kerdan Šoutjärven školan istorijan opendai Aleksandr Pavlovič Maksimov nevoi ičeze openikale Natašale päzuda opendamhas Petroskoin universitetha istorijan fakul’tetale da tulda radmaha Šoutjärven muzejaha. Natalja muga tegi-ki. Nügüd’ hän radab muzejas jo enamba 32 vot.  

— Milei om mel’he nece rad. Voib olda, sikš muga teravaze mänob aig. En voi uskta sihe, sanub Natalja.

Hän sel’genzoitab, miše navedib ičeze radod, sikš ku se om sidotud hänen rahvahaze, sen kul’turaha, kel’he. Ližaks, sikš ku muzejas radaba mugoižed-žo ičeze rahvast navedijad ristitud, ühtes hö tegeba tarbhašt radod.