Narjan-Maras zavodihe “Kundaližen diplomatijan škol”
Narjan-Maras zavodihe “Venäman igähižed vähäluguižed rahvahad. Kundaližen diplomatijan škol” -ühthižvenälaižen openduzprogramman regionaline etap. Siš tedotab Venäman Pohjoižen, Sibirin da Edahan Päivnouzman igähižiden vähäluguižiden rahvahiden associacijan press-služb.
Neche etapaha ühtneb 21 mest erazvuiččiš Venäman regionoišpäi (Karjalaspäi, Piterin agjaspäi, Bur’atijaspäi da äjiš toižišpäi). Vepsän rahvahad Narjan-Maras ezitaba Anastasia Jevtušenko Šoutjärvespäi da Sem’on Pozdn’akov Piterin agjaspäi.
— Nece om toine etap, miččen pätegend om antta ühtnikoile tarbhaižid tedoid rahvahiden oiktusiden kaičendan polhe, a mugažo opeta heid satusekahašti kosketadas valdmehidenke — kut sijaližidenke, muga verazmaižidenke-ki, kirjutab Anastasia ičeze VKontakte-lehtpolel.
Nedalin aigan ühtnikad diskutiruiba regionoiden igähižiden vähäluguižiden rahvahiden tuges, a sen ližaks — tradicionaližen elonladun, radmahtoiden, kul’turan da kodikeliden kaičendas, pedroidenpidätusen, etnografižen turizman da sijaližen biznesan kehitoitandas.
Mugažo programmaha mülüba vastused valdmehidenke, kundaližiden sebroiden da biznesan ezitajidenke. Vastusil pagištas küliden tehnologižes kehitoitandas, kodiden sauvondas, socialižes i tervhuz’tuges, mankävutoitandas, ümbrišton varjoičuses da tradicionaližen elomišton kehitoitandas.
Regionaline etap lopiše ekspertoiden seminaral, miččel diskutiruidas bioäjüden kaičendas da sän vajehtuses. Seminaral Associacijan prezident Aleksandr Novjuhov vasttase Neneckijan avtonomižen ümbruzkundan valdmehidenke.
Tarkištele "Oma Median" MAX-kanalad!
