Nügüdläšt vaihištod kätas vepsäks
“Vepsän kul’tursebr” -vägesti Karjalan Pämehen grantoiden konkursas ”Kel’ da kul’tur: tämbei, homen, kaiken” -projektanke.
— Kaik projektan azjtegod om oigetud vepsän rahvahan kelen da kul’turan kaičendaha da kehitoitandaha. Erasid azjtegoid tehtas ühtes karjalaižidenke. Tal’vkun lopus mäneb seminar vepsläižiden da karjalaižiden tradicionaližiš tedoiš da kul’turjäl’genduses. Tahtoim vajehtadas parahimil praktikoil tedo- da kul’tursebroidenke, mugažo opendajidenke da aktivistoidenke Karjalaspäi, Piterin da Vologdan agjoišpäi, sanui “Oma Mediale” “Vepsän kul’tursebran” pämez’ Larisa Čirkova.
Grantan tugele toižel vodel Šokšus tehtas ”Vepsän rahvahan tradicijoiden mödhe” -pajofestival’, ”Vepsläine sarn” -konkurs Kalages, literatur- da fotokonkursad. Ližaks, nenile rahoile jatktaba ičeze radod vepsän kelen kursad koumes Änižröunan rajonas, kätas nügüdläšt vaihištod vepsän kel’he, tehtas literaturine konkurs. Ezmäine azjtego om planuitud vedäda Petroskoiš jo necen voden tal’vkus, tedotab “Vepsän kul’tursebr” ičeze VKontakte-lehtpolel.
Uzišt neciš temas voib lugeda mugažo venäks.
