Myö-karjalaiset: toiminnalla tulokaš projekti piätty
Myö – karjalaiset -projektin rajoissa tämän vuuvven aikana oli pietty toimenpitoja karjalaisien, šuomelaisien ta vepšäläisien kanšallisen kulttuurin šäilyttämisekši. Projektin piätehtävänä oli viettyä kurššija ta opaštua runokylien oppahie.
– Kurššien kaikki materialit myö panima 40-šivuseh oppahan päiväkirjah. Šemmosen šai kuuši kurššin opaštujua. Käyttyän materija hyö voijah viettyä opašretkijä Vienan kylie myöten, šano projektin johtaja Julija Filippova.
Projektin tulokšista paistih loppuseminarissa Koštamukšešša. Šiinä esiinnyttih Päiväkirjašša painettujen materialien kirjuttajat: Kalevala-eepossan spesialisti Irina Rinkevič, kotišeutututkija Mujejärveštä Tatjana Tupina ta karjalaisen kulttuurin tietäjä L’udmila Tihonova.
Myö – karjalaiset -projekti piätty, ka šen tulokaš toiminta vuatiu jatkuo.
– Projektin aikana šuatuja tietoja on tovellah kallehie. Pitäis, jotta niitä vois tiijuštua ken vain tahtou. Myö tahomma uuvvistua info-tauluja Karjalaisešša gorničašša, jotta tilan vierahie vois lukie niitä, lisäsi Julija.
Lisäkši projektin rajoissa luajittih kukloja Orvokki-teatterie varoin, valmissettih kolme infotauluo, vietettih kyläpruasniekkoja. Projekti voitti Karjalan piämiehen granttikilpailun ta oli toteutettu Arhippa Perttusen šiätijön ta Viena-šeuran jäšenien voimin.
