Muujärveššä kunnoššetah alovehta lammin viereššä
Muujärven lammin viereššä šijottujua alovehta kunnoššetah Infrastruktuuri elämyä varoin -kanšallisprojektin rajoissa. Asiešta ilmottau Karjalan tašavallan rakentamisen, elinkunnallistalouven ta energetiikan ministerijö.
— Muujärven pos’olkan keškukšen lähellä Sovetskaja-kavulla šijottuu luonnollini lampi, kummaista käytetäh tulipalovesistönä. Še paikka on aina muanitellun pos’olkan eläjie, ka lammin rannoilla kašvo varvikkuo, ta paikka ei šopin kävelyillä, ministerijö kertou tiijotukšeššah.
Vuotena 2023 pos’olkan hallinto ehotti, jotta aloveh Sovetskaja-kavulla ois ošallistun Yleisvenäläiseh iäneššykšeh kunnoššettavista objektiloista. Paikka tuli voittajakši. Šamoin aloveh voitti iäneššykšeššä vuosina 2024 ta 2025, min jälkeh šiih ašetettih kulkijapolku, skammit, kukkapenkit ta uurnat.
Tänä vuotena lujennettih lammin rantalinja ta ašetettih näköalapaikka.
Avonaini tila niise voitti iäneššykšeššä vuotena 2026. Tulovaisuošša šiih järješšetäh tila aktiivista lepuo varoin.
Yhty Oman Median MAX-kanalah!
