Mujehjärven da Louhen piirit: on kielletty meččih käyndy
Mujehjärven da Louhen piirilöis on kielletty meččih jallai da ajonevvoloil käyndy. Käskyn poikkevuksellizen tilan kurih nähte meččytulipaloloin periä allekirjutti Karjalan piämies Artur Parfenčikov.
— Täs päiväs algajen on kielletty kävvä jallai da ajonevvoloil Mujehjärven da Louhen piirin meččih, poikkevuksennu ollah vaigu yhtehizes käytös olijat autotiet, ilmoittau Karjalan tazavallan luonnonrikkahuksien da ekolougien ministerstvu omassas tiedottehes VK-sivul.
Meččytulipaloloin sammuttamizeh on kučuttu Ven’an poikkevuksellizien tiloin ministerstvan Karjalan tazavallan piälimäine haldivo, Karjalan tazavallan eläjien elaijan toimindan da turvalližuon valdivokomitiettu, paikallizet haldivot, toizet laitokset.
Karjalan tazavallan piämies käski lujoittua vägijoukot meččytulipaloloin sammuttamizen kohtis, kaikil valdivoelimil aigoinaijal tarkastua tilandehtu käytettävien keinoloin effektiivižuon arvostamizekse.
Ven’an gidrometeorolougizen keskuksen ennustuksen mugah poudu da räkki siä Karjalas pyzyy vie vähimite nedälin.
Aihies voit lugie suomeksegi.
