Mujehfestivali avasi kalanpyyntikauven
Ylä- Kuitin rannoilla piettih perintehelliset kalaššuškilpailut ta mujehfestivali. Tapahtuma kešti kakši päivyä: enšimmäisenä päivänä kokenuot ta alottelijat kalaštajat käytih laškomah verkkoja ta toisena päivänä noššettih ne järveštä ta kačottih, ken šai enemmän kalua.
Kun kalamiehet oltih kalaššušhommissa, rannalla oli pruasniekka. Kylän eläjillä ta vierahilla kerrottih perintehellisistä šyömisistä, kumpasissa käytetäh mujehta, piettih muasteri-oppija, missä joka halukaš voipi luatie ičellä puukala ta lappuja mujehen kuvan kera šekä vietettih opašretkijä, myötih käsityötavarua jarmankalla, tarittih kalaruokie ta järješšettih mujehjuokšuo.
— Mie perehen kera olin enšimmäiseh kertah pruasniekašša ta tahon šanuo, jotta šen pitämini hyvin auttau karjalaisen kulttuurin šäilyttämiseššä. On ilo, jotta pruasniekašša oli äijän lapšie ta jotta oli karjalan kielen kenttä, missä joka halukaš tiijuštau uušie šanoja, kerto festivalin vieraš Anna Nikandrova.
Kalamiehien kilpailuissa tarkissettih, ken šai enemmän kalua ta ken rutompah puhisti šitä. Kilpailuissa voitti Muikku-joukko, toisella paikalla oli joukko “Mujehta ei ole” ta kolmannella Kaunis šuari -joukko.
Pruasniekan ohjelmašša niise oli laulu- ta tanššiesitykšie. Kaikilla vierahilla oli mukava, vesselä ta makie netälinloppu.
