Mujeh on tapahtuman keškukšešša
Vuokkiniemeššä piettih Mujehfestivali. Šajekuun 5.—6. päivinä vanha karjalaini kylä tuaš otti vaštah vierahie šuureh kalapruasniekkah.
Kuot’t’elomah kalaššušonnie tällä kertua tuli 11 joukkuo. 5. šajekuuta kalaštajat lašettih omat verkot Kuitti-järveh. Enši päivänä hyö noššettih verkkoh, myöššyttih rantah ta šiitä ošallissuttih eri kilpailuih: ken enemmän kalua šai, ken nopiemmin ottau kaikki kalat verkošta ta puhaštau ne.
Festivalin kilpailun voittajakši piäsi Šuutele miut, onni -joukko ta šai piälahjakši uuvven venehmouttorin. Toisella paikalla oli Teknilliset piätökšet -joukko ta kolmannella — KV 1 -joukko. Kaikki kilpailun voittajat ta ošallistujat šuatih lahjat partn’oriloilta.
— Miun Platon-punukka eläy Koštamukšešša. Tänä vuotena mie šain hänet šuoštumah ošallistumah miun kera ta hiän tuli. Myö uškoma omah voittoh. Kyllä, meitä autto monivuotini kalaštajan kokemuš. Toivon, jotta punukka nyt rikenempäh rupieu käymäh kalalla miun kera, šano Šuutele miut, onni -joukon jäšen Valerii Pavlovič Stepanov.
Joka vuosi festivalin järještäjät Sreda-keškuš ta Vuokkiniemen kylätalo -etnokulttuurikeškuš yritetäh kummaššuttua vierahie. Hyö kekšitäh mukavua ohjelmua ta niise šäilytetäh karjalaisie perintehie.
Mujehfestivalin vetäjäkši oli kučuttu Marina Noženko — Kiži-musejon opaš, kumpani kantau kunnivonimie “Venäjän paraš opaš”. Hänen kera festivalie piti Sreda-keškukšen johtaja Jelena Hmelevskaja. Vetäjät paistih karjalakši ta venäjäkši vierahien kera.
Folkloriohjelma šamoin oli pohatta. Konsertissa esiinnyttih Tuari-folkryhmä, Yarga Sound System -šähkö-etnomusiikin projekti, Kataja-ryhmä Vuokkiniemeštä, Valerija Koškina Miun mujeh -laulun kera šekä Headway Dancers -tanšširyhmä.
Kylän vierahat ta eläjät ošallissuttih kaikenmoisih muasteri-oppiloih, otettih valokuvie muissokši kaunehešti korissetuissa valokuvapaikoissa, oššettih muistolahjoja jarmankalla, käytih opašretkilöissä kylyä myöten ta Ončin talošša šekä voitih tarkistua omie karjalan kielen tietoja.
Festivali piettih kuuvventeh kertah.
