Muatalovus: omua kukkua 8. Kevätkuun pruazniekakse
Fermeru Julija Šelemeh da Artur Parfenčikov šeikuittih ferman tuliedu ruaduo. Paiči t’ul’panoi Julija kazvattaugi mandžoidu. Fermeran käytös on 20 gektuarua muadu.
Ferman ruaduo kannattau Karjalan muatalovusministerstvu. Mulloi ministerstvan abu oli miljon rubl’ua. Nämmih den’goih ostettih kuda-midä tehniekkua, istutettih mandžoin taimenii da väitettih muadu.
Tänävuon fermal kazvatettih 100 tuhattu t’ul’panua, niilöis 76 tuhattu kukkua jo myödih suurin tukkuloin sobimuksien mugah, vie läs 20 tuhattu kačotah myvvä Naizienpäiviä vaste.
– Vaigevustu kukkien myöndäs ei ole, sanoi fermeru. – Vaigevustu on myöndykohtan suamizes. Derevl’ankal, kus myö ainos myömmö kukkii da kus meidy jo hyvin tietäh, emmo voi muite myvvä, meil pidäy yhtyö auktsionah.
Karjalan piämies käski ekonoumiekan ministerstvan ruadajile sellittiä tämä probliemu lyhyös aijas. Hänen mieles, moine tilandeh, konzu paikallizel tuottajal pidäy yhtyö auktsionoih myöndypaikan suamizekse muugalazien jyttyöh, ei ole oigei. Sidä paiči Artur Parfenčikov käski valmistua kirjaine Ven’an halličukseh. Kirjazes häi kehoittau muuttamah zakonua, kudaman mugah fermerat registriiruittas oma biznessu sie, kus tämä biznessu ruadau. Nygöihäi biznessu registriiruijah sie, kus eläy biznesmies. Uuzi zakon kehitettäs kylii, sildy no verot medäs paikallizeh b’udžiettah.
